2Pe 3 | ASO | STEP | Lu'ne lengeme nouvoni' alevekizo, luhuvo meve nene gohi naba tuu luhuvo nene nogize-lingiduve. A'mine luhuvo sitaku' mene lingine lutingu' gatingu' gilaa' naani' nene mo lisihe' laminekovo' gililizangumu' nene gamazi ma lutine do ote-lengedo lo gatine nouve.

2 Peter 3

Evene' Malite Guvelesi Ve Nene nGelo Alihe Li Ha Lilizaha Ei' Gamazi've Do Gihile Izo Mo Aloseize. Lingine A'mine Alingumu' Gizebo Igi Nizangu' Nene Lengi' Monovotido' Gizebo Lekeseve Igi Mini Monovo Lisihe' Laminekovo' Igi Mili Minilo Lo Petolo' Lo-ngimine' Gamazi

1 Lu'ne lengeme nouvoni' alevekizo, luhuvo meve nene gohi naba tuu luhuvo nene nogize-lingiduve. A'mine luhuvo sitaku' mene lingine lutingu' gatingu' gilaa' naani' nene mo lisihe' laminekovo' gililizangumu' nene gamazi ma lutine do ote-lengedo lo gatine nouve. 2 A'mine gamazi nene O'moso'mi polohetelite alinge' soto' iline' initekumu' li soto' ani' gamazi nesi ido' Guvetesi ve mino do lu' izaa' ive minive Izesu Kilisito' lo-lidine' gamazi lengi' aposolotinete li-lingimani' nesi nene gililizave lo lo gatine nouve. 3 Inite' naba nene ado' ti' li gililizangumu' noluve: Gamene alinge' nela nene evene' engi' lu'nidokovo' e'meti mini monokumu' gize abelenga laa' ave ma igi ti' li 4 lilisave: Aza tine' molo alosuve lo lo huko line' ne'mi gihile've ma nene zaa' soto' ive. Ado' metemote nesi nene gizebo igi mini hilikeni'za inite' muki' nene ma do atoli'mine amivo Okulumo' misubo gana' soto' idoti' nene hamoli'minevo' ogo mine do novine' nenako ngelo alihe. 5 Ne'mine laa' naani'za ado' mene lo-lengemeloni' gamazimu' nene gelalone li ga'ine hizi ngi likeve: Ado' O'moso'mo lavo Okulumo' nene gozopo' aka'mila soto' ivo misubo nesi nene nosouti' soto' ogo noso veleta gala'muda minavo oluso' minine' ve. 6 Ido' a'mine noso ne'mo nene a'mine gamenelo' minine' misubo nene molo hito do goloso ine' mamu' nene ga'ine molavo inite' muki' nene ma senisi amave laa' nave. 7 Ido' a'mine O'moso'mo lo neine' gamazi ne'mo nene a'mine idise nizasine' Okulumokisi misubosi nene ololi'mi minani ne'mine mini mono' gilamave lihime ngemeline' gamene nabamu' nene gizebo ha nizasive lo neine' ve.

8 Lu'ne lengeme nouvoni' alevekizo, inite' hamo' a'mene lo-lengemeloni' gamazi nemu' nene gilami minikelizave: Ado' Guvelesi ve'mo gamenemu' gelaa' neine' nene do ato' ogo gelaa' neive. Aza neve nene gamene li'nibe gamene hamo' ne'minemu' nene gelavo gamene ha'na goloso kilisimasi vanu tauseni (1,000) ne'mine minine' gelaa' neive. Ido' gamene ha'na kilisimasi vanu tauseni ne'minemu' nene gelavo gamene li'nibe gehepeve gamene hamo' ne'mine minine' gelaa' neive. 9 Evene' malite Guvelesi ve alosa lo huko line' gamazi do gihile izelingumu' nene zou zou gohi lave li gilaa' nani' nene ladani igi gilikeve. Aza nene zou zou lamive. Asi evene' hamokisi vi tolovo ilizave lo gelamo mukito' nene lu'ine di velepe' izilizahoo lo lengikumu' nene goseleka lamo ha gizebo o neive. 10 Ne'mine ogo neiha guminelo' ve alisave lo gelamune' gamenelo' igi hetelaa' nani' ne'mino a'mine Guvelesi ve aline' gamene've nene soto' oloseive. A'mine gameneu' Okulumo' neve nene gugu lo vo haha oloseive. Ido' a'mingu' inite' mata' muki' nene ololi'movo' lovo' lovotevo' o-ngidivo haza nite' gidilisave. Ido' misubo nesi ido' a'mingu' di soto' naani' inite' muki' nesi nene ololi'mo ningeleseive. 11 Ne'mino ololi'mo inite' mata' muki' nene ninge osu' lavo apile osu' lilido' o neine' nenaze. A'mine O'moso'mi gamene nabamu' gizebo igi minilizangu' nene a'mine gamene nene geto ogo hetelelingumu' ve li O'moso'mi evenele gehepeve mini monoku' monovo laminetokovo' e'meti minilizado' o neive. Ado' a'mine Okulumo' nene ololi'mo lovo apilevo' neivo a'mingu' mini'mi monani' inite' mata' nene lala lilizani' gamenemu' nene noluve. 13 Ido' ne'mino lo osu' loloseine'za aza lo huko lo-lidine' gamazi do gihile izo monovo lisihe' laminekovo' mineline' Okulumo' atoli'mine gosohokisi misubo atoli'mine gosohokisi do soto' o-ledeleseive lo a'minemu' gilingili ogo gizebo ogo none.

14 Nemu' nene lu'ne lengeme nouvoni' alevekizo, a'mine initekumu' gilingili igi gizebo igi minilizangu' nene Guvelesi ve ogo ningeline' nene laza luteu' goloso monovo nomivo ido' okodelo' gamazi nomivo mino hongu lo nonivo ningelive li a'midokovo' amuzo mili minilo. 15 Ido' Guvelesi ve aza geto amo gizebo ha ogo neingumu' gililizani' nene aza evene' gohi ma do lu' izelingumu' nene ne'mine ogo neive lisa nene gili minilo. Leze zuho lute eme nonive Paulo'ni O'moso'mo gele nge lo minaa' monovo lehize-dido' do molo azasi nene a'mine mene luvoni' gamazi ne'minesi nene mo luhuvo gize-lingidine' ma neive. 16 Ido' luhuvo nite' muki' ei' gizingu' nene a'mine ne'mine initekumu' gizidaa gizida nene a'mine hamoli'mine gamazi memu' nene mo azasi hamo' gamazivo' gize'mo vo neive. Ido' a'mine luhuvo nite' gize'mo vingu' nene gamazi linge ma monovo've geto gele lamine' amolonido' o minine' gamazi nesi nene gize neive. Ne'mino neine' nenako mono' monovo gili vevesami lu'ine amuzo molamive ingine mono' godolou' gamazi linge'mi monovo nesi nene di zovo' zava' izaa' naadi'mine igi a'mine Paulo' gamazi've nesi nene a'mine'mine igi di zovo' zava' izaa' nave. Ne'mine iga' naadoti' nene angise'ine meni'ine goloso nene di soto' iga' nave. 17 Nemu' nene lu'ne lengeme nouvoni' zuhokizo, lingine a'mine ne'mine ilizangumu' nene mo gili nizani' ma neize. Lingine monoku' lamine' mine ngi li nizanguti' nene mono'ine nomivete di zovo' zava' izaa' naani' monovo'ine ne'mo nene gelelehe' o-lengedavo limi ingikelizaze. Ehe' igi ningisa minilo. 18 Ne'mine igi mini Guvetesi ve do lu' izaa' ive Izesu' Kilisito' ninge lamine' oga' neine' monovolo' e'metaa' naani' nene gohi di naba i'mi vi mini eze monovo danava've nesi nene gili ngolo' li'mi vi minilo. Eita guvele soto' oga' neine' monovo've nene minevo minevo' ogo idisesi alingetasi mine do vo minilihoo. Mo ne'mino minelive.

Moda a'nesi' ve.